На шеиците од Катар им се нуди да градат марина во Љубаништа?

Премиерот Никола Груевски и Министерот за финансии Зоран Ставрески деновиве, во рамки на посетата на Доха, Катар на десетина поголеми компании им презентирале идеен план за изградба на марина во охридското село Љубаништа, информира „Вест“.

Како што се наведува во текстот, марината треба да биде во состав на поголема туристичка населба која државата треба да ја изгради за привлекување на странски инвестиции во делот на охридското крајбрежје, кој се наоѓа во близина на границата со Република Албанија.

-Станува збор за туристичка развојна зона. Во тек е фаза на нејзино проектирање, а пред  сите потенцијални инвеститори се презентираат нејзините можности и содржини кои се предвидени да се изградат. Меѓу тие содржини е и марина за закотвување на јахти, глисери и бродови,ја пренесува „Вест“ информацијата на Министерството за транспорт и врски.

Според планот во туристичката населба е предвидена и изградба на хотели, апартмани, ресторани, на трговски центри и други содржини за забава.