Според дел од резултатите добиени од истражувањето спроведено во рамките на проектот „Охрид-туристички бренд што ветува” голем дел од анкетираните странски туристи го оценуваат високо Охрид, односно со средна оценка 7.8. Секој од испитаниците го оценуваше личното задоволство од посетата на нашиот град на скала од 1 до 10, каде што максималната оценка значеше и максимално задоволство и исполнување на нивните очекувања. Најголем дел, т.е 42% (од точно 111 пополнети прашалници) ја дале оценката осум (8), додека само 15% го вреднувале Охрид од 3 до 6. Ако на ова се надоврзе и сознанието дека 91% од анкетираните странски туристи повторно би го посетиле Охрид, може да се каже дека нашиот туристичи центар генерално го исполнува „ветеното” пред странските туристи.
Графикон: Општо ниво на задоволство кај странските гости
Иако стереотипот е дека охриѓани не се многу љубезни, сепак, според странските гости кои се изјаснија дека повторно би дошле, како главна причина ја наведуваат „љубезноста на локалното население”, „квалитетот на туристичките услуги” и едноставно се „воодушевени од градот”.
Истражувањето, финансирано од Локалната ќе биде објавено во целост на сајтот од Општината и на сајтот од Здружението Е КУЛ ТУР, а печатеното издание, со сите резултати и насоки, ќе биде поделено на повеќе релевантни фактори од туристичката бранша од Охрид.
Спаско Костоски
