Среќни сме што успеваме и покрај големата конкуренција Охрид да го оддржиме во кругот на познатите туристички центри од Југоисточна Европа, рече на денешната прес конференција градоначалникот Александар Петрески, во врска со добиената награда „Златно туристичко срце- Шампион на културниот туризам“ во Југоисточна Европа што ја доделува Меѓународната туристичка асоцијација Sacen Internacional.

– Оваа награда за нас претставува уште еден поттик за продолжување на активностите кои се реализираат од страна на Секторот за локален економски развој, рече Петрески.

Наградата е резултат на претходно извршените контроли врз хотелите и рестораните во градот, услугата, како и комуналната хигиена, објасна раководителот на Секторот за ЛЕР, Гоце Симоноски.

– Патрола составена од експерти од земјите од југоисточна Европа во изминатиот период доаѓаа ненајавено и посетуваа хотели, ресторани, ја пратеа работата на општината, комуналната хигиена, како и тоа колку се вложува во инфраструктурата и начинот на промоција на саеми, рече Симоноски. Тој додаде дека наградата е резултат и на проектот кој се работи заедно со градот Венеција, кој значи една поширока транснационална програма за промоција на туризмот на градови заштитени под УНЕСКО.

– Обврска за сите нас е да го оддржиме нивото и понатаму да го развиваме туризмот, особено културниот, кој ќе овозможи туристи преку целата година, потенцира Симоноски.

Меѓународната туристичка асоцијација САЦЕН ИНТЕРНАТИОНАЛ постои 53 години , а 21 година преку наградата „ Златно туристичко срце“ го поттикнува развојот и подигнувањето на квалитетот во угостителско- туристичкото стопанство во земјите од Југоисточна Европа.

Т. К.