Најматен настан во јуни е Владата ќе вработи партиски членови, а најбистар најавеното поднесување на прекршочни пријави од Државната комисија за спречување на корупцијата за 40 функционери кои не доставиле изјави за спречување на судир на интереси, покажа последната анкета Бистро-Матно на новинската агенција Макфакс и невладината Транспарентност нулта корупција.
Половината од вкупно 18 уредници на електронски и печатени медиуми во Македонија за најматен настан во јуни избраа „СДСМ: Владата ќе вработи 30 илјади партиски членови на неопределено време“. Опозициските социјалдемократи обелоденија записник од владина седница во кое се министерството за финансии се задолжува најдоцна до први септември да ги заврши активностите за трансформација на привремено вработените лица во трајни вработувања на неопределено време. СДСМ тврди дека се работи за 30.000 партиски војници на ВМРО-ДПМНЕ, а министерството за финансии соопшти дека станува збор за 5 илјади лица – главно од социјалата и културата кои долги години, уште од времето на СДСМ се привремено вработени и не им тече никаков стаж.
Втор матен настан со шест гласа е „Осомничен убиец доби само домашен притвор“. Осомничениот Насер Халити, за убиството на Хамдија Бралиќ во крвавиот фудбалски натпревар во средно Коњаре, наместо зад решетки заврши во домашен притвор. Ова е еден од ретките примери во историјата на македонското судство, осомничен за убиство и нелегално држење оружје за време на истрагата да не биде во притвор во казнена институција.
Три гласа меѓу матните настани доби „и во бегство Иснифарис Џемаили си игра со државата“. Овчарот од Бачило Иснифарис Џемаили пред да избега во Турција оставил дуќан од осум квадрати и една нива во Тетово. Државата не може да си го наплати долгот од 800 илјади евра, бидејќи овчарот упорно си поигрува со законите.
Убедливо најбистар настан со 16 гласови е „40 функционери добија прекршочни пријави од Антикорупциска“. Државната комисија за спречување на корупција соопшти дека ќе поднесе прекршочни пријави против службените лица кои не доставиле изјави за спречување на судир на интереси до предвидениот рок, а казната за неисполнувањето на оваа законска обврска ќе биде од 1000 до 3000 евра. Меѓу функционерите е еден пратеник 26 судии и 13 градоначалници.
Два гласа меѓу бистрите настани доби отворањето на антикорупциски канцеларии на Економскиот факултет во Скопје и Државниот Универзитет во Тетово .
Во анкетата Бистро-Матно за јуни учествуваа главните уредници на телевизиите: А1, Алфа, Алсат, Наша ТВ, Телма, Канал 5, радио Канал 77, дневните весници Бизнис, Вест, Време, Дневник, Лајм, Нова Македонија и Утрински весник, неделниците Глобус, Фокус, Форум и Капитал.
Месечната анкетата „Барометар на корупција – Бистро-Матно” агенцијата Макфакс и „Транспарентност нулта корупција” ја организираат од 2004 година.
Владата реагира на анкетата Бистро-Матно
Тврдењето дека Владата ќе вработи 30 илјади партиски членови на неопределено време е дел од кампањата на СДСМ, и не соодветствува на вистината, реагира владината прес-служба на анкетата Барометар на корупција Бистро-матно – најцрн настан за јуни, изготвена од НВО Транспарентност нулта корупција.
„Не навлегувајќи во методолошкиот пристап на анкетата, цениме дека определениот најцрн настан за месец јуни СДСМ: Владата ќе вработи 30.000 партиски членови на неопределено време”, е резултат на политичката кампања на Социјалдемократскиот сојуз што јасно се гледа и од насловот на самата тема која е дадена на гласање“,се наведува во писмената реакција на Владата.
Во реакцијата се додава дека „реалноста и фактите се поинакви од тезите на опозицијата кои се земени како примерок за гласање. Се работи за трансформација на работен однос на неопределено време, на лица кои досега биле вработени на определено време. Се работи за пет илјади лица на кои ќе им биде трансформиран работниот однос“.
Ова стои во текстот на анкетата што ја подготвуваат агенцијата Макфакс и Транспарентност нулта корупција: „СДСМ тврди дека се работи за 30.000 партиски војници на ВМРО-ДПМНЕ, а министерството за финансии соопшти дека станува збор за пет илјади лица – главно од социјалата и културата кои долги години, уште од времето на СДСМ се привремено вработени и не им тече никаков стаж“.
