– Поради вонредните услови – реновирањето на покривот на училиштето , изложбата сега е сместена во просториите на зградата од поранешната општина. Таму, со одличното разбирање и прием на домаќините, ни беше отстапена просторијата на Општинскиот центар за услуги, каде беа изложени 100-тината прекрасно исшарани и украсени јајца, чии автори се токму учениците на подрашното училиште во Косел, а со свои јајце-творби учествуваа и учениците од подрачната паралелка во Вапила, изјави проф. Донески.
Изложбата предизвика голем интерес кај сите ученици и вработените во зградата на поранешната општина, а истата ја посетија и родители на учениците од Косел.
Меѓу стотината јајце-творби можеше да се забележат различни мотиви, соодветно на детската фантазија и ученичкото секојдневие, а изборот на Најјајце го направи седумчлената комисија во која беа претставник на родителите, претставникот на Општинскиот центар за услуги, раководителот на училиштето, како и наставници кои за овој ден се ангажирани во Косел. По подолго разгледување и дискусија , комисијата одлучи да награди 12 ученици, чии јајце-творби посебно им го запреа погледот. Најдобрите ќе бидат наградени со соодветна книга, како и ЦД со македонска изворна песна.
