Наместо за комуналии Владата подобро е да ги вложи парите за изградба на театар

Општина Охрид треба  да биде дел од изградбата на Светиклиментовиот Универзитет затоа што се работи за бесценета инвестиција од образовен , културен и туристички аспект, една од најголемите инвестиции во Охрид. Обидите да се спореди овој комплекс со други градежни комплекси од комерцијален карактер, како станбени згради, во најмала рака се несериозни, велат од советничката група на ВМРО- ДПМНЕ, по чие барање на последно одржаната седница, на дневен ред беше ставена предлог одлуката за учество на општина Охрид во уредувањето на градежното земјиште на кое е планирано да се гради Свети Климентовиот Универзитет на Плаошник.

– Ослободување на инвеститорот од плаќање на т. н. комуналии би значело наместо парите да одат за таа намена ,Владата таквата сума на средства  да ја инвестира повторно во Охрид, преку нов проект како што би била изградбата на зграда за професионалниот театар, секако во соработка со локалната самоуправа . Во секој случај се работи за барање и одлука кои ќе бидат од многукратна корист за градот и тоа не само заради инвестициската димензија, туку и политичката,  затоа што со тоа би се ставило крај на политичкиот инает што како процес го уназадува Охрид веќе подолго време, вели Дејан Паноски, координаторот на советничката група на ВМРО- ДПМНЕ.