Во експлозијата на гас за домаќинство што вчера се случи во зграда во центарот на чешката
престолнина Прага, нема повредени македонски државјани. Во експлозијата загинаа најмалку три лица, додека 35 луѓе се
повредени, јавија локалните медиуми повикувајќи се на полициски и
спасувачки извори.
Во Прага живеат, работат и студираат голем број македонски државјани, меѓу кои има и охриѓани, со кои по веста за немилиот настан во контакт стапила локалната самоуправа.
-Во Прага во моментов на академијата за филмска уметност има десет студенти од Македонија, меѓу кои е и охриѓанецот Антонио Велјаноски, со кого вчера по веста за експлозијата стапив во контакт. Тој беше видно вознемирен, но не е повреден. Разговарав со него и утрово, неговата психичка состојба е стабилизирана и добив информација од него дека ниту еден од македонските студенти не е повреден.-изјави градоначалникот на Охрид Никола Бакрачески.
