Направените анализи во лабораторијата во Германија покажаа дека нема присуство на Зика вирус кај пациентот со микроцефалија кој пред две ипол недели беше примен на Клиниката за детски болести, информираат од ЈЗУ Универзитетската клиника за детски болести во Скопје.
– Пациентот, три месечно бебе од Дојран, беше препратено од матичниот педијатар од Струмица со сомневање за аномалија на главата позната како микроцефалија. Невролозите по направените испитувања предложија да се направат дополнителни анализи за да се утврди причината за оваа состојба. Анализите кои пристигнаа покажаа дека не се работи за Денга и Зика вирусот. Која е причината за микроцефалијата, ќе ја утврди тимот од одделот Неврологија со понатамошни анализи, изјави директорката на клиниката, др Аспазија Софијанова.
Од клиниката додаваат дека причина за микроцефалијата можат да бидат вируси кои ги имала мајката во првите три месеци од бременотса кога се формираат ограните кај плодот. Натамошните испитувања и утврдувањето на причинителите ќе го дефинираат и понатамошниот начин на лекување на пациентот.
OhridNews
