Многу повеќе снег има во охридско и струшко, каде снежната покривка на места достигнува и до еден метар. Животот во повеќе села се одвива отежнато во зимски услови, а до некои од нив храна и лекови се доставуваат со хеликоптери.
По вчерашните акции во струшките села Модрич и Дренок, денес е предвиден дотур на храна и лекови со хеликоптер и во селото Јабланица. Како што информираат од Центарот за управување со кризи, одлука е донесена и е издадена дозвола за летање, но зависи од временските услови дали акцијата ќе се реализира.
Напори се прават и за пробивање на патниот правец Лабуништа- Боровец – Јабланица. Екипите на Македонија пат постојано работаат со цел расчистување на овој патен правец кој веќе со денови е завеан.
Струшкото село Јабланица е едно од најголемите планински села во овој регион и брои околу 350 жители.
