На Клиниката за инфективни болести во Скопје во последните 24 часа се хоспитализирани нови 15 пациенти сомнителни за инфлуенца А Х1Н1, јави МИА.
Здравствената состојба на сите новопримени пациенти како што се наведува во соопштението од Министерството за здравство, е стабилна, освен кај еден пациент, кој е со потешка форма на пневмонија и е поставен на респиратор. На Клиниката во моментот се лекуваат 83 пациенти.
На инфективното одделение, пак во Воената болница се згрижени уште четири пациенти, сомнителни за инфлуенца А Х1Н1. Сите новопримени пациенти се во стабилна здравствена состојба и се лекуваат од потешка форма на пневмонија. Вкупен број на хоспитализирани овде е 21 лице со симптоми на грип.
На Клиниката за детски болести во Скопје во изминатото деноноќие се хоспитализирани 11 нови пациенти и таму во моментов болнички се лекуваат 60 пациент со симптоми на грип (на возраст од шест месеци до пет години). Сите новопримени пациенти се со полесна клиничка слика, освен четири деца, кои имаат потешка форма на пневмонија.
На Институтот за белодробни заболувања кај децата – Козле, во изминатото деноноќие се хоспитализирани уште шест нови пациенти со полесна форма на пневмонија и таму во моментот се лекуваат 42 деца.
ohridnews
