Денес, претпладне новинарите ќе имаат можност да се сретнат и да поразговараат со актерите и режисерите кои се гости на Францускиот филмски фестивал.
На прес конференцијата која ќе се одржи во прес салата на дирекцијата на фестивалот Охридско лето, медиумите ќе имаат можност да им постават прашања на Жан-Ив Лавоар, директор на Францускиот Институт во Скопје, Жак Доајон, режисер и почесен гостин на фестивалот кому оваа година ќе му биде доделена наградата за животно дело, потоа со Ева Јонеско, актерка и режисерка и со актерите Абрахам Белага и Елоди Навар. На прес конференцијата ќе биде присутен и Макс Азуле, копретседател на фестивалот.
На Францускиот филмски фестивал кој беше отворен во Центарот за култура во Охрид, на 30-ти јуни со проекција на филмот „Збогување со кралицата “ во режија на Беноа Жако, ќе бидат прикажани вкупно 9 долгометражни и 12 краткометражни остварувања на француската кинематографија. Фетивалот ќе биде затворен на 5 јули со проекција на филмот „Никаквица“ од режисерот Жак Доајон.
Овој фестивал е една од најзначајните филмски манифестации и најзначајната француско-македонска културна манифестација во Македонија.
