Според извори на МИА, новиот бран навлезе и во општините и помеѓу локалните функционери избрани или именувани од општинските власти. Освежувањата, оваа фаза, ќе зафатат шест директори на јавни комунални претпријатија, три секторски директори, четири директори на училишта, еден директор на јавна здравствена установа и еден директор на индустриска зона. Ќе биде внесена и нова енергија на местото на шест раководители на општински сектори кои покриваат определени области, кои на ниво на општина имаат улога на еден вид локални министерства.
Во оваа фаза бранот се проширува на девет општини во државата. Радовиш, Скопје, Илинден, Гевгелија, Крива Паланка, Битола, Велес, Центар и Кисела Вода се локалните самоуправи каде се очекуваат извесни пополнувања на раководните функции кои остануваат празни.
Од ВМРО-ДПМНЕ ги потврдуваат информациите на МИА и велат дека лицата кои си заминуваат од позициите го дале својот максимум во реализацијата на програмата. Додаваат дека ова се само дел од позицииите кои се зафатени со бранот и дека во идниот период ќе следуваат нови освежувања на локалните функции за кои што, врз основа на петмесечната анализа во која беа вклучени и граѓаните преку анкети, ќе одлучува партиското раководство во соработка со градоначалниците.
извор: МИА
