Стилот на облекување многу зборува за личноста. Облеката не го чини човекот, но дефинитивно многу кажува за него и е важен дел од невербалната комуникација со околината, преку која им помагаме на другите да не запознаат и видат со кого комуницираат, вели охриѓанката Марина Коцарева Ранисављев, моден дизајнер која живее и работи во Белград, каде е и професор на Високата школа за дизајн, технологија и менаџмент.


Ранисављев неодамна ја издаде книгата “Мода и облекување”, која од страна на критичарите во Србија беше оценета како значаен придонес во областа која не е многу обработувана,  една од основните човекови потреби- облекувањето. При тоа,  прикажувајќи ги психосоциолошките корени и современи аспекти на модата .


–  По изминати седум години пишување и две години доработка, книгата беше објавена во октомври 2010 на белградскиот Саем на книги, а официјално промовирана во март. Првичната идеја да ја пишувам произлезе од потребата на предметот кој го предавам- Психологија на облекувањето. Кога започнав да истражувам користејќи бројна литература, сфатив дека не е лесно да се одговори дури и на наједноставното прашање- Зошто се облекуваме? Се служев со литература од облaста на социологијата, психологијата, етнологија, филозофија. Одговорот на кој наидов е дека во почетокот човекот почнал да се облекува за да се покрие и заштити од надворешни влијанија, за потоа тоа да премине во потреба за истакнување на сопствениот статус, кој е важен и денес, потенцира професор Ранисављев.

Таа истакнува дека нашиот изглед пред се зависи од нашиот став и сигурност. – Колку повеќе сме свесни за своите физички и психички карактеристики, но и сигурни во себе, толку повеќе сме подготвени да ја поврзиме нашата внатрешност и надворешност во една автентична целина, која ќе биде поинаква од другите. За жал, често пати доаѓа до униформираност, која се јавува особено  кај младите, кои  одат по една линија на помал отпор и се одлучуваат за претопување во масата, наместо да истражуваат и пронајдат сосптвен имиџ. Не ретко избирајќи негативни примери од естрадата и околината, вели Ранисављев.

Таа го нагласува и значењето на боите на облеката кои оддаваат многу за тоа во какво расположение се наоѓаме.

– Бојата има свое психолошко дејство и затоа и посветив значајно место во својата книга, објаснува професор Марина Коцарева Ранисављев. Ако сме расположени, најчесто се одлучуваме за појаки, весели бои и спротивно на тоа, штом не сме расположени се одлучуваме за некои смирени и неутрални нијанси, преку кои што понеприметно ќе го минеме денот .

Т. Кувенџиска