Во организација на Зружението на ветерани од одбраната и безбедноста на Република Македонија, а под покровителство на градоначалникот Јован Стојаноски,  во Охрид денеска се одржа манифестацијата „Езерска средба, Охрид – 2018“. Како повод беше искористено одбележувањето на 10-годишнината од работењето на охридскиот огранок на здружението. На средбата присуствуваа претседателот на  Зружението  на ветерани  од одбраната и безбедноста на Република Македонија, генерал Филип Котели, почесниот претседател, пратеникот и генерал Илија Николовски, како и претседателите на националните здруженија на ветераните од Бугарија – генерал Топалов, на Албанија – генерал Кондури, претставници од Србија и други гости.

На отворањето на средбата, хорот на средношколскиот центар Свети Климент Охридски, ја изведе химната на Република Македонија и охридската староградска песна Билјана платно белеше.

Покровителот на манифестацијата, градоначалникот Стојаноски, во својот поздравен говор ја нагласи континуираната поддршка и помош што општина Охрид ја дава на невладиниот сектор, особено на проекти кои ја интензивираат прекуграничната соработка и отвораат можност за заеднички настап пред европските фондови.

Стојаноски ја нагласи определбата овој настан да се искористи како повод, да прерасне во традиција, во насока на соработка и разбирање на народите од трите соседни пријателски земји.

Истовремено, рече тој, со оваа манифестација се отвораат нови можности за соработка и промоција на нашиот град во регионот. Негови гости беа градоначалниците од општините во Македонија и Албанија кои гравитираат околу Охридското Езеро.

Претседателот на општинскиот огранок на ветераните од одбраната и безбедноста за општините Охрид и Дебрца, Добре Вељаноски, посочи дека низ досегашното работно искуство и делување, ги  реализирале планираните активности не само во двете општини, туку и пошироко во цела Западна Македонија.

– Особено ни е секојдневна и сеопфатна соработката со Здружението на борците и поддржувачи од Охрид, при што со задоволство ја истакнувам нашата активност во негувањето и афирмацијата на револуционерните и борбени традиции. Во општина Дебрца оспособивме 4 спомен објекти, како наш придонес за одбележување на настаните од НОВ: Спомен соба на НОВ во Дебрца (Белчишта), Спомен дом на Првата македонско косовска борбена бригада (Сливово), Спомен дом на ГШ на НОВ и ПОМ  (Црвена Вода) и Спомен соба на Шестата бригада и баталљонот “Мирче Ацев” (Годивје) – нагласи Вељаноски.

Претседателот на Зружението  на ветерани  од одбраната и безбедноста на Република Македонија, генерал Филип Котели, акцент стави на заедничкото делување на  ветераните и помладото членство, додека за резултатите рече дека се тие плод на искуството и ентузијазмот.

– Формирани сме 2001 година, имаме 13 ограноци во земјата со над 1.400 членови. Иницијатоири сме на зближување на земјите и народите. Многу блиску соработуваме со албанската асоцијација, на кој план е најактивно членството од Охрид, потоа со Бугарија, Србија, Хрватска, Србија, Словенија и Романија. Се поврзуваме и со нашите колеги од БиХ и Унгарија.-потенцираше Котели.

На свечента седница говореа и гостите од националните асоцијации на Бугарија и Албанија. Беа доделени дипломи, благодарници и признанија на соработници, гости и заслужни членови на асоцијациите на ветераните. Тие ги разгледаа културно-историските знаменитости во старото градско јадро, по што имаа заедничка прослава во хотелот Нова Ривиера.

OhridNews