Јавното обвинителство пред почетокот на повторениот судски процес за  трагичната несреќа што пред речиси една и пол година се случи на шанк во комплексот „Пливалиште“, во која загинаа тројца стружани, го измени обвинителниот акт. Поради тоа процесот беше одново одложен, со цел одбраната да може соодветно  да се подготви.

Обвинетите Цвете Вранишкоски, Климе Миладиноски и Гоце Јанески нема да одговараат како соучесници, туку ќе се утврдува одговорноста на секој од нив поединечно за кривичното дело за кое се товарат „предизвикување тешки дела против општата безбедност.


Адвокатот на одбраната, Ставре Џиков смета дека е извршена важна промена во квалификацијата од обвинителниот акт и очекува дека судскиот процес ќе биде правичен со цел да се утврди вистината за немилиот настан.

-Сите оние докази кои беа изведени, а судот не ги зеде во вид во претходната постапка очекуваме да бидат разгледани. Одбраната исто така бараше и реконструкција на настанот, но ќе видиме сега во понатамошната постапка како судот ќе ги изведува овие докази, изјави адвокатот Џиков.

Неговиот колега, Димитрија Цобоски смета дека обвинителството во оваа фаза од процесот не може да врши измени на обвинителниот акт.

-Согласно законот за кривична постапка измена, или дополнување на обвинителен акт може да има откако во текот на постапката ќе бидат изведени доказите. Ние имаме ситуација кога од страна на Апелациониот  суд во Битола е укината првостепената пресуда и главниот претрес почнува одново, и на самиот почеток на главниот претрес кога имаме обвинителен акт кој е на правна сила без да се изведе  било каков доказ се врши имена на обвинителниот акт, истакна Цобоски.


Местото на трагедијата

Овој судски предмет беше вратен на повторно судење откако Апелациониот суд во Битола ја укина претходната пресудата и ја уважи жалбата на бранителите на обвинетите.

Според решението на Апелациониот суд во Битола, првостепениот суд недоволно ја утврдил фактичката положба, а немало ниту образложение какви дејствија поединечно презеле обвинетите Цвете Вранишкоски, Климе Миладиноски и Гоце Јанески. Тројцата беа прогласени за виновни за тешки дела против општата безбедност. Вранишковски доби казна од четири години затвор, Јанески беше осуден на три години и четири месеци затвор, а Миладиновски доби тригодишна затворска казна. Во обновената постапка првостепениот суд ќе мора да изведе дополнителни докази при донесувањето на пресудата.

Во несреќата што се случи на 11 септември 2010 година настрадаа тројцата долгогодишни пријатели, лекарите Јосиф Докоски (56) и Киро Ѓоргоноски (57), како и Јоско Кувенџиески (48).

OhridNews