Нема траги на насилство на телото на 44-годишниот воен разузнавач Горан Софески кој утрово беше пронајден мртов во шумскиот предел кај месноста „Бела вода“ во близина на Кичево. Оваа информација ја соопштија од СВР Охрид, врз основа на првичниот увид кој бил извршен на лице место.
-Ова е потвредено од извршениот увид предводен од Јавен обвинител од Основното Јавно обвинителство од Кичево како и од медицински екипи од Општата болница во Кичево кои на лице место извршија медицински преглед. По извршениот увид, а по насоки на Јавниот обвинител, телото на сега починатиот е предадено на неговото семејство, изјави за OhridNews потпаролот на СВР Охрид Стефан Димоски.
Безживотното тело е забележано утрово во 08 часот и 35 минути на потегот помеѓу кичевските села Раштани и Горни Длапкин дол. Било видено од група граѓани од селото Раштани.
Инаку, вчера во 16 часот и 30 минути, во полициската станица во Кичево, како исчезнато лице е пријавен сега починатиот Софески, за што веднаш е известен надлежниот Јавен обвинител и оформена е екипа за вршење потрага.
Горан Софески беше поранешен шеф на военото разузнување, а во рамките на својот ангажман има откриено голем број афери, меѓу кои и онаа за шверцот со армиското оружје.
OhridNews
