Затоплувањето на времето и големите температурните осцилации предизвикуваат одрони од карпата кај „ Мостот на желбите“. Поради тоа надлежните служби од Локалната самоуправа деновиве поставија знак кој предупредува на опасност од одрони.
-Истовремено, заедно со Заводот за заштита на спомениците и другите надлежни државни институции, ќе биде покрената иницијатива за заштита на карпата кај Канео, со што ќе се избегнат опасностите од одрони, информираат од Локалната самоуправа.
Најголема опасност се заканува од потпорниот ѕид од летната сцена Долни сарај, каде се забележани сериозни напукнувања. Надлежните велат дека проблемот не е нов и дека уште пред неколку години подготвиле план за санација на оштетениот ѕид, за што според проценките се потребни околу 3 милиони евра.
Неодамна граѓани од стариот дел на градот реагираа на зачестената појава на одрони и во густо населените подрачја околу улуцата “„Цар Самуил“. Одрони од камења и ситни карпи забележани се и околу Канео, поради што на граѓаните им се препорачува крајна внимателност кога се движат во овие делови на градот.
OhridNews
