Охрид денеска е домаќин на состанокот на Комисијата за широкопојасен интернет и дигитален развој формирана од Меѓународната телекомоникациска заедница и УНЕСКО, со која претседаваат мексиканскиот бизнисмен и најбогат човек на светот Карлос Слим и претседателот на Руанда Пол Кагаме.


Собирот што се одржува во хотелот „Инекс Горица“ го поздрави  премиерот Никола Груевски, кој истакна дека Македонија вложува сериозни напори во развој на информатичките и комуникациските технологии.

-Во 2006 година само еден процент од домаќинствата во Македонија користеа широкопојасен интернет, додека во 2007 година бројката се зголеми на 7 проценти. Во 2008 година  23 проценти од домаќинствата употребуваа широкопојасен интренет, а во 2009 година 33,8 проценти, додека до крајот на 2011 година имаме 46,35 проценти корисници на фиксен широкопојасен интернет во домаќинства. Доказ за постигнатите резултати се податоците од Државниот завод за статистика, како и од Евростат. Во првиот квартал на 2011 година 55 проценти од домаќинствата имаа пристап до Интeрнет во своите домови, што е за 8,9 процентни поени повеќе во споредба со истиот период во 2010 година. Овој процент во 2006 година изнесуваше 16,5 проценти, истакна Груевски.

Тој пред високите гости ги изнесе предностите за инвестирање во Македонија, посочувајќи дека преку неа на компаниите им се отвора европскиот пазар со 650 милиони консументи.


Конференцијата ја отвори претседателот на Руанда Пол Кагаме, кој укажа на придобивките од широкопојасниот интернет.

-Откако Комисијата го одреди широкопојасниот интернет за приоритет, сведоци сме на бенефитот од употребата на новата технологија во развојот на светот, рече Кагаме.


На состанокот на Комисијата се обрати и вториот ко-претседавач, Карлос Слим кој се заблагодари на гостопримството и топлиот прием кој го доживеал во Македонија. Телекомуникацискиот магнат го потенцираше влијанието на широкопојасниот интернет и новните технологии за развојот на малите и средните претпријатија и бизниси, како двигатели на светскиот економски развој.

– Сепак, иако е светски тренд, се уште постојат држави во кои ограничениот пристап до широкопојасниот интернет претставува отворена пречка за нивниот развој, рече Слим, посочувајќи дека токму широкопојасниот интернет како светска агенда ќе им помогне на малите и средните претпријатија да отворат нови работни места, да ги прошират своите производни активности и услуги, да донесат нови иновации и да ја постават основата за идните бизниси кои ќе бидат носители на светскиот економски развој.


По воведниот дел Комисијата за широкопојасен интернет работата ја продолжи за затворени врати, а заклучоците од средбата во Охрид ќе бидат објавени на прес конференција закажана за попладне.

На состанокот во Охрид што  првпат надвор од вообичаената практика на Комисијата да заседава во канцелариите на ОН во Женева, Париз или Њујорк, учествуваат претставници од Австралија, Руанда, Италија, Франција, САД, Сингапур, Србија, Катар, Јужна Кореа и Финска, како и претставници на светски познати компаниии кои се двигатели на информатичкото општество како  што се „Телефоника“, „Циско“, „Алкател“, „Ериксон“ и „ИНСО“.