Остри критики за состојбите во медиумската сфера упати претставничката на ОБСЕ за слобода на медиумите Дуња Мијатовиќ, која престојуваше во работна посета на Mакедонија.
Таа испрати порака до власта да овозможи правна рамка за непречено професионално работење на
медиумите, но и до новинарите да бидат искрени кон себе и да сфатат дека треба
да и служат на јавноста, а не на политиката и бизнис интересите.
– Крајно време е сопствениците на медиумите и новинарите да разберат
дека и служат на јавноста, а не на политичарите и на бизнис интересите.
Време е да го вратите дигнитетот на вашата професија. Новинарите не
треба да се делат по основ на нивните политички интереси, затоа што
поларизацијата е деструктивна за општеството, истакна
Мијатовиќ.
Таа посочи дека земјава треба да работи на подобрување на правната регулатива, да ги реформира јавниот сервис и Советот за радиодифузија и да ја декриминилизира клеветата, а од новинарите побара и поголемо единство.
Според неа, неприфатливо е за едно демократско општество да има 165 случаи за клевета против
новинари, но и случаи на тужби на новинари против нивни колеги.
Мијатовиќ оствари средба со премиерот Груевски од кого добила ветување дека власта ќе поработи на овие прашања.
