Краткиот одмор кој го доби од Напредак Крушевац , македонскиот репрезентативец Војдан Стојаноски го искористи во кругот на своето семејство, да ги наполни батериите за продолжението од српскиот шампионат. Напредок каде нашиот интернационалец е стандарден по одиграните 14 кола се наоѓа на шестото место на табелата со скор 9-5. – Исклучително тешка година е зад нас пред се поради економската состојба во спортот. Годината што измина ќе остане запаметена по освоениот куп со Амак СП. Одлуката за расформирањето на клубот тешко ми панда, а ако за нешто жалам тоа е што не успеавме да постигнеме позначителен резултат во првенстовото. Настапот на евробаскетот во Полска сигурно е настанот број еден додека епитеот личност оди за капитенот Врбица Стефанов кој на најдобар начин не предводеше и успешно ја заврши играчката кариера.
Стојаноски пред стартот на новата сезона сино – белиот дрес на Амак СП го замена со црвено – белиот на Напредак. Бекот поентер во националниот состав направи кратка паралела помеѓу македонската и српската лига. – Стилот на игра во двете лиги е скоро ист, но во Српската лига се игра физички појако, така да и физичката подготвеност на играчите е на повисоко ниво, па затоа е потребен понапорен тренинг и многу повеќе работа.
Македонската кошарака е најпогодена од светската рецесија а таквиот тренд најмногу ќе го почуствуваат кошаркарите од младите категории на кои не се внимава многу, смета Стојаноски.
– Состојбата во спортот е многу тешка, како поради лошата економска состојба на клубовите, така и поради условите за тренинг кои се на незавидно ниво, а кои многу негативно влијаат на развој на спортистите, пред се на младите категории
Стојаноски за кого ова е прво интернационално искуство, прв пат во својата кариера е разделен и од својот брат близнак Дамјан со кого досега одеа во тандем. Вели дека му недостига но дека полека се привикнува, а колку и да му фали како соиграч мора го прифати фактот, тоа е спортот.
М.П/К.Д.
