Од идната недела охриѓани ќе можат да се вакцинираат против сезонски грип. Како што информираат од Центарот за јавно здравје за потребите на Охридскиот регион се набавени околу 1.500 вакцини, кои се очекува да пристигнат по 20-ти октомври.
-Откако ќе ги добиеме вакцините ќе започнеме со имунизацијата на населението во Охрид. Вакцината против грип е незадолжителна вакцина и се дава на доброволна база. Најдобро е вакцината да се прими пред почетокот на сезоната на грип, за да може организмот да развие имунитет навреме. Вакцината му обезбедува заштита на организмот од вирусот на грип во времетраење од најмногу една година и затоа е потребно вакцинацијата да се повторува секоја година пред започнување на сезоната на грип, вели д-р Јованка Стурлакова Корвешовска, од Епидемиолошкото одделение при Центарот за јавно здравје во Охрид.
Таа објаснува дека против грип е пожелно да се вакцинираат повозрасните лица кои имаат над 65 години, лица со хронични форми на заболувања, бремени жени и деца кои имаат намален имунитет, но интерес за вакцинација треба да пројават и други категории на население како што се здравствените работници и лица кои имаат професии, во кои при извршување на работните активности имаат постојан контакт со луѓе.
Според најавите од Министерството за здравство, вакцината против сезонски грип и годинава ќе чини 400 денари.
Е.М
