Затворениот базен кој охриѓани го очекуваа со години, конечно ќе почне да се гради на почетокот на идната градежна сезона, односно во март или април, информираат од локалната самоуправа.
– Одржавме состанок со луѓето кои го изработуваат проектот и во почетокот на наредната недела ќе биде доставен до Агенција за млади и спорт која е нарачател на проектот. Согласно законската процедура, агенцијата во текот на неделата треба да го достави проектот до локалната самоуправа и да побара одобрение за градба, кое веднаш ќе го дадеме, и за затворениот базен и за теренот за вештачка трева, изјави секретарот на општина Охрид, Димитар Спасески.
Како што тој потенцира, давањето на одобрение за градба значи и завршување на потешкиот дел од подготвителните активности за реализацијата на проектот.
– По добивањето на одобрението, верувам дека Агенцијата за млади и спорт со соодветна динамика ќе го објават тендерот за избор на изведувач и лично очекувам дека изградбата ќе почне во месец март или април 2014 , рече Спасески.
Како што неодамна најави градоначалникот Никола Бакрачески, Охрид ќе добие ултра модерен спортско рекреативен центар, во кој ќе има затворен и отворен базен, игралишта за тенис, кошарка и фудбал, вештачки терени со трева и еден лизгачки терен за зимски спортови.
Т. К.