Со пригодна свеченост што се одржа на Машка плажа пред х. Дрим во Струга, трите крајезерски града по десети пат заеднички го одбележаа 21-Јуни, Денот на Охридското Езеро.


Домаќинот на манифестацијата, градоначалникот на Струга Рамиз Мерко, истакна дека соработката што ја воспоставиле трите општини пред една деценија, резултира со конкретни проекти од интерес на граѓаните во регионот.

-Пред десет години во Поградец, трите крајезерски градови потпишаа спогодба за заедничка соработка и заштита на Охридското Езеро и се заложија за слободно движење на граѓаните во пограничниот регион. Денес тоа е стварност, и граѓаните од трите општини  границата сега ја минуваат само со лична карта.При крај е и изградбата на колекторскиот систем, што е исклучително важно за зачувување на Охридското Езеро како најголемо богатство во регионот, истакна Мерко.

Тој најави дека заедничка заложба на трите општини ќе биде продлабочување на меѓуграничната соработка и изработка на заеднички проекти за привлекување на средства од ИПА фондовите.


Градоначалникот на Поградец, Артан Шкмби, рече дека наредна заложба на трите општини ќе биде да се тргне границата на Охридското Езеро, со што ќе се овозможи  слободно движење по воден пат.

-Останува да ја продлабочиме соработката во интерес на сите граѓани од регионот, рече Шкмби.

Градоначалникот на општина Охрид, Александар Петрески забележа на неприсуството на претставници од централната власт на манифестацијата, укажувајќи дека ингеренциите над Охридското Езеро се во раце на државата, која управува и со водните ресурси и рибниот фонд во езерото.

Петрески посочи дека трите општини имаат одлична соработка, што придонесува за развој на целиот регион.

-Трите општини не гледаат меѓусебна конкуренција, туку се надополнуваат во равојот на туризмот, рече Петрески.

Тројцата градоначалници уште еднаш ја актуелизираа идејата за воспоставување меѓународна бродска линија меѓу Охрид, Струга и Поградец, како и идејата за набавка на брод за чистење на тињата од Охридското Езеро, која понатаму би се користела за добивање ѓубриво за земјоделството.


На одбележување на Денот на Езерото присуствуваше и амбасадорката на Германија во Македонија, Гудрун Штајнакер, која истакна дека ваквите манифестации ќе придонесат за привлекување на меѓународен интерес за регионот.

Денот на Охридското Езеро годинава ќе биде одбележан со повеќе пригодни манифестации што заеднички ги организиараат градот Струга, туристичкиот кластер на Југозападна Македонија „ЕДЕН“ и велосипедските клубови „ЕкоДром“ и „Соларис“ со поддршка од ГИЗ -РЕД, Германската меѓународна соработка во Македонија и Амбасадата на Германија во Македонија.
Во рамки на одбележувањето, утре, ќе биде отворен саем на кој ќе бидат презентирани можностите за активен одмор во Југозападна Македонија. Саемската манифестација во сабота ќе продолжи пред Центарот за култура „Григор Прличев“ во Охрид.

Во сабота ќе има национална велосипедска трка во Дебарца, а во недела и интернационална трка со велосипеди околу Охридското Езеро, „Заобиколи го езерото, почитувај го езерото“.

Г. Момироски