Советот на Глобалниот еколошски фонд ГЕФ на вчерашната седница во Вашингтон донесе одлука со која го одобри за имплементација Проектот за заедничко управување со Дримскиот басен, поднесен од Дрим Кор групата и UNECE.
Проектот, на кој се работеше неколку години и помина низа различни фази, од македонска страна беше работен од страна на Дејан Пановски од Билатералниот секретаријат и член на Дрим Кор Групата.
– Ова е победа на посветеноста и работата. Верувам во капацитетите дека проектот ќе биде успешно спроведен, затоа што во него ќе учествуваат стручни лица од институции и од граѓанскиот сектор. Сето тоа ќе придонесе да се постигне целта за квалитетно управување на Дрим и езерата и да се оствари бенефит за населението. Лично сум задоволен што идејата и мојата мисија конечно се исполнети и изразувам благодарност до сите што помагаа и веруваа, изјави Паноски по објавување на одлуката за одобрување на имплементацијата на проектот.
Проектот предвидува фаза на подготовка од 6-8 месеци и главна фаза од 48 месеци. Грантот е предвиден на сума од 4,5 милиони евра за сите држави во басенот.
