Одземени 200 возила на дивите превозници, се предлагаат поригорозни казни за истите

Нелојалната конкуренција на дивите и нелегални превозници кои сообраќаат по патиштата во земјава,  ќе се намалува со зголемени контроли од страна на инспекторите за транспорт, во соработка со царинските службеници. Ова го изјави Министерот за транспорт и врски Миле Јанакиески, кој образложи дека од март до сега времено им се одземени околу 200 возила на дивите превозници.

Според ресорниот министер, целта е обезбедување поквалитетни услуги во јавниот превоз, но и зголемување на приходот во државниот буџет по основ на ДДВ. „Има позитивна тенденција на зголемување на продажбата  на автобуски билети за 40 отсто. Ова значи дека се зголемува и бројот на патници кои патуваат со лиценцирани фирми, но и дека драстично се намалува нелојалната конкуренција“ – вели Јанакиески.

Министерот најавува и изготвување на листа на сомнителни превозници, кои претходно правеле прекршоци. Преку СМС и електронска пошта, Државниот инспекторат ќе добива информации за состојбата на граничните премини. „Од податоците на министерството ќе може да се види дали превозникот во меѓувреме извадил лиценца и дали воопшто ја поседува. “ – додава Јанакиески.

Со предложените законски измени на Министерството за транспорт и врски, се предвидуваат поригорозни казни за нелегалните превозници со трајно одземање на возилата. Инаку, при контроли на 102 субјекти во патниот сообраќај  од јуни досега, се  изготвени 2.393 записници за отстапувања од законската регулатива, а од март времено се одземени 200 возила.