Пријавениот, во периодот од 9-ти до 17-ти овој месец, со употреба на подесен алат и физичка сила, како и со кршење на стакла, од повеќе патнички моторни возила, паркирани на охридските плажи, одземал пари, лап-топ компјутери, фотоапарати, мобилни телефони и други вредни предмети, со што се стекнал со противправна имотна корист од над 450.000 денари.
Забележувајќи возило „Мерцедес“, паркирано на патот кон авто-кампот „Градиште“, пријавениот, го скршил предното десно стакло, и од внатрешноста одзел 3800 евра, две патни исправи и еден фотоапарат „Канон“. Од патничко возило марка „Тојота“ паркирано кај „Св.Стефан“, сега притворениот А.К. одзел 43000 денари, пет мобилни телефони, рачни часовници и сребрени прстени.
На паркинг просторот кај плажата „Горица“, со кршење на задното десно стакло, тој, влегол во возило „Голф“, од каде одзел 300 евра и платежни картички. Веднаш потоа, од возило „Матиз“ паркирано пред плажите кај „Св.Стефан“, кое насилно го отворил со кршење на бравата од десната врата, одзел „Делл“ лап-топ компјутер, мобилен телефон, фотоапарат „Самсунг“, повеќе парфеми и две торбици со алишта. На истиот начин А.К. успеал да влезе и во повеќе други возила, паркирани пред повеќе други плажи на охридското крајбрежје, но и на паркинзите кај „Кадмо“, болницата „Св.Еразмо“ и „Центарот за обука на вода“. Низ отворено стакло, од автомобил, паркиран во централното градско подрачје, одзел мобилен телефон оставен на предното седиште, додека со кинење на заштитна мрежа од отворен прозор влегол во семејна куќа во Охрид, од каде одзел 150 евра и помала сума денари.
Пријавениот А.К. во чиј дом при претрес пронајдени се дел од одземените предмети, е наркозависник и сторител на кривични дела за што бил осудуван на повеќегодишни затворски казни.
