Организацијата Македонија 2025 во соработка со Македонската развојна фондација за претпријатија (МРФП), организира “Глобален инвестициски самит за Македонија 2012“, кој ќе се одржи од 18 до 21 октомври во Охрид.
Главна цел на Самитот е да ги презентира македонските инвестициски и извозни можности пред претставниците на македонската дијаспора и останатите потенцијални инвеститори.
Предвидено е учество да земат видни бизнис лидери од дијаспората, врвни професионалци од глобални корпорации, министри и претставници на македонската влада, како и успешни македонски бизнисмени.
Самитот претставува уникатна можност за поврзување и стимулирање на соработката меѓу македонските компании кои имаат развојни проекти и извозни капацитети со компании од странство, со цел остварување заеднички напредок и успех.
„Сметаме дека овој настан ќе биде значаен чекор кон зајакнување на врската меѓу дијаспората со македонската бизнис заедница цо цел стимулирање на трговијата, инвестициите и економскиот развој“, се вели во најавата за настанот.
Македонија 2025 преку своите економски програми е посветена на позиционирање на Македонија како посакувана дестинација за странски директни инвестиции, како и промоција на конкурентните македонски индустрии на глобалните пазари.
Извор:Макфакс
