Уште едно Европско првенство беше и помина. Охрид требаше да живее за и со кошарката, но охриѓани растрчани кој на автобуска, кој кај чинарон, кој кај банкана по туристи кои годинава и тоа како го заобиколуваат македонскиот бисер, заборавија на 11- те национални селекции од Европа кои допатуваа во Охрид.

Неизбежен е фактот дека и организаторот (КФМ) не посвети доволно (читај ич) внимание на рекламата, но факт е дека и никој од локалната власт не се појави во “Билјанини Изоври“ ако не барем да види како тече Европското првенство кое се игра во Охрид.

“Нели Охрид, не  е Париз  па и ако нема патокази може човек да ја пронајде салата“. Изостана традиционалниот  прием на земјите учесники кај градоначалникот, а никој од Општината не се појави на доделувањето на наградите.

Не сакам така да помислам, но скопјани (КФМ) како да беа оставени сами на себе да се снаоѓаат како знаат и умеат во Охрид. Дали едно Европско првенство, било тоа и младинско, заслужи ваков однос од градот домаќин, е прашање на кое  некој од надлежните во локалната самоуправа треба да даде одговор.

М.Постоловски