Покрај Охрид и Струга, како аранжмани, гостите од земјите на Бенелукс кои се очекува ова лето да бидат најбројни на ривиерата, ќе имаат можност да посетат повеќе градови кои се дел од кружната тура што ја нудат тур-операторот „Корендон“ и нејзиниот македонски партнер „Фибула ер Травел“. Тие имаат изготвено понуда за пакет-аранжмани со кружни тури низ Македонија, со повеќедневен престој и посета на сите позначајни културни и природни атракции во земјата. Така покрај Охрид и Струга, во рамки на престојот во Македонија туристите ќе имаат можност да ги посетат уште и Кавадарци, Неготино, Струмица, Штип, Скопје и Вевчани.
За промоција на Македонија како туристичка дестинација, „Корендон“ досега инвестирал околу 500 илјади евра. Според последните информации, холандскиот тур-оператор има продадено над шест илјади или 80 отсто од закупените аранжмани за Охрид и Струга. Доколку се исполнат очекувањата „Корендон“ уште во јуни би можел да го продолжи договорот за закуп на аранжмани на охридско – струшката ривиера за 2012 година.
