Вчера кај дете во Тетово бил регистриран и првиот случај на грип од типот АХ3Н2 за оваа сезона. Според упатените, овој тип грип е сезонски, а на подрачјето на Македонија бил присутен и изминатите години.
– Минатата година во декември имаше 900 случаи со грип, во јануари 7.000, а во февруари 13.000. Досега против грип се вакцинирани 24.000 лица. Министерството за здравство до сите центри за јавно здравје достави дезинфекциски средства за раце и простории за тие да се поделат во здравствените установи, како и лекот Тамифлу кој ќе биде бесплатен, вели Јованка Костовска, раководител на Секторот за превентивна здравствена заштита.
Таа нагласи дек Комисијата за заразни болести и пандемски грип постојано заседаваа и ја следи состојбата. Се препорачува да се користи повеќе витамин Ц и топли напитоци и да се избегнуваат пациенти кои имаат какви било респираторни заболувања.
– Се очекува по завршувањето на распустот на учениците да има поголем интензитет на грип, додаде Костовска.
Жарко Караџовски од Институтот за јавно здравје рече дека во последните три недели е регистрирани зголемен број заболени од респираторни инфекции.
– Грипот трае седум до 10 дена, а потешка клиничка слика бара интензивно лекување и антибиотска терапија, истакна Караџовски.
Во врска со состојбата со грип во Европа, тој посочи дека е регистрирана ниска активност.