22 натпреварувачи, 12 во машка и 10 во женска конкуренција ќе ги брануваат водите на Охридското Езеро на јубилејниот 25 маратон кој утре ќе се одржи на 30 км долгата патека “Климе Савин“. На утрешниот маратон ќе се појават минатогодишните победници во машка и женска конкуренција, Бугаринот Петар Стојчев и Хрватската маратонка Карла Ситиќ.
– Превземени се сите безбедносни мерки трката да биде организирана на највисоко ниво, сите потребни елементи, медицински тим, спасувачи се обезбедени и ние сме подготвени за старт на маратонот – рече Сашко Точко од ПК Охридски Бранови.
– Охридскиот маратон како традиционална манифестација е од особено значење за македонскиот спорт, а поготово што ова е и промоција на Охрид и Република Македонија. Очекувам од година во година оваа манифестација да напредува и на неа да учествуваат се поголем број натпреварувачи – истакна директорот на Агенцијата за млади и спорт, Диме Спасов кој за наредната година најави зголемување на наградниот фонд.
Делегат на ФИНА за овогодинешната последна трка од Гран При серијата е Џон Вест. Тој не го криеше задоволството што е присутен во Охрид на овогодинешното јубилејно 25 издание.
– Ова е последна трка за оваа година и чест ми е што сум овде во Охрид. Последните три недели беа исцрпувачки бидејќи се одржаа три маратони во серија, јас сум тука и мора да се осигураме дека ќе бидат задоволени сите услови потребни за одржување на трка од Гран При серијата – напомена Вест.
Стартот на трката е во 12 часот , во комплексот Св Наум додека целта ќе биде на градското пристаниште. Првите пливачи на целта се очекува да пристигнат после 17 часот.
М.П.
