Со панихида и положување на свежо цвеќе охриѓани и Македонија му оддадоа почит на големиот поет и преродбеник, Григор Прличев. На денешен ден се навршуваат 117 години од неговата смрт. По тој повод во спомен куќата на Прличев се одржа традиционалната охридска визита , на која секоја година се собираат поклониците на делото на Прличев.


Беседа за Прличев одржа есеистот и литературен критичар Санде Стојчевски, кој истакна дека Прличев е поетски гениј со неспоредлива моќ да испее лирско-епско дело со непотрошлива уметничка енегргија. Креативната самоувереност на Прличев е толкава што тој рамноправно се поставува и спрема највеликите европски духовни творци, рече Стојчески.


–    На рамна нога со нив ги коментира книжевните постапки, измислува констатациии и коментари и оправдано книжевно или не, се осмелува да ги корегира, скратува и упрекнува европските книжевни авторитети, укажувајќи на неотпорностите, недоследностите или некој друг вид слабости во нивните дела, истакна Стојчевски.



За делото на Прличев говореше и есеистот и поет Бранко Цветковски, кој  потсети на придонесот на охридскиот Хомер во историскиот развој на македонската литература и македонската современа книжевност.

– Еден од најголемите предизвици за сите генерации македонски поети на 20 и 21-от век , останува неповторливиот аскет на поетското совршенество од 19-от, Григор Ставрев Прличев, а епицентарот на неповторливиот творечки и животен подвиг, без споредба во втората половина на 19-от век, во целосен балкански контекст е појавата на поемата на „О Арматолос“ и големата победа на прочуениот атински конкурс пред 150 години“, рече Цветкоски.

Во рамки на манифестацијата „Прличеви беседи“, вчера во центарот за култура на поетот Михаил Ренџов му беше доделна наградата за најдобра поема за 2009 година, а беше распишан и литературниот конкурс за 2010 година.
Ohridnews