Со својата најнова, меѓусезонска колекција “При фол”- 2011,  дизајнерот со светска кариера, охриѓанецот Ристо Бимбилоски го отвори третото по ред издание на Модниот викенд- Скопје 2011.  Ова е првата ревија на Бимбилоски во Македонија. Тој веќе 18 години работи и живее во Париз и успешно ја гради својата креаторска кариера во трите најголеми светски модни центри, Милано, Париз и Њујорк.

– Станува збор за модели од меѓусезонската колекција 2011, зима- лето, кои веќе се продадени во Америка, Италија, Кина, Арапските Емирати. Моделите, во февруари,  имаа можност да ги видат клиентите во Њујорк, а како ревија овде за прв пат  се прикажуваат, вели Бимбилоски.


 – Задоволен сум од тоа како протече настанот и од конечниот резултат и покрај тоа што во организацијата учествуваше мал тим кој работеше со голем ентузијазам. За вакви настани треба многу повеќе да се вложи и од страна државата со цел проектот да биде на повисоко ниво. Пред се треба да им се помогне на оние кои овде дизајнираат и се талентирани, за да создадат добар бренд кој ќе се извезе надвор, изјави за OhridNews Бимбилоски по завршувањето на ревијата.


Бимбилоски, кој е роден во Охрид, постојано е на релација помеѓу родниот град, каде се наоѓа неговата фабрика во која се создаваат креациите и Њујорк и Париз, каде најчесто ги претставува своите колекции во рамки на поголемите светски модни настани.


Во неговата  биографија значајно е да се споменат и соработката со познатата модна куќа „Луј Витон“, како и со светски познатиот дизајнер Марк Џејкобс.

Т. Кувенџиска