Министрите за внатрешни работи на Македонија и на Србија, Гордана Јанкуловска и Ивица Дачиќ, во Охрид ќе потпишат договор за олеснување на граничните процедури, односно минување на границата со биометриски лични карти.

Договорот ќе биде потпишан на маргините на Министерскиот форум за внатрешни работи и правда, што денес и утре се одржува во х. „Инекс Горица“.

Според најавите, Договорот на сила ќе стапи по ратификација од страна на парламентите, што ќе им овозможи на граѓаните македонско-српската граница да ја минуваат само со биометриска лична карта.

Министерката Јанкуловска неодамна изјави дека Македонија е отворена за разговор за вакви договори и со други земји, кои ги исполнуваат безбедносните стандарди и во смисла на контрола на границата и безбедност на документите.

OhridNews