На покана на Општина Бургас, Друштвото „Бугарски писател“, народните читалишта „Љубен Каравелов 1940“ и „Асен Златаров“, како и издавачката куќа „Балтика 2002“, од 4 до 7 ноември во Бугарија престојуваа четворица охридски писатели.


охридските писатели во разговор со своите колеги во Бургас

Тоде Илиевски, Зоран Јакимоски, Лидија Размоска и Мишо Јузмески првото претставување пред бугарската читателска публика го имаа во четвртокот, во уметничката галерија „Петко Задгорски“ во Бургас. Овде гостите беа претставени од своите бугарски колеги: поетесата Милка Стојанова зборуваше за Тоде Илиевски; прозаистот Атанас Радојнов зборуваше за својот колега Мишо Јузмески; за поезијата на Зоран Јакимоски зборуваше поетесата Бина Калс, а Роза Бојанова го претстави најмладиот член на македонската делегација, поетесата Лидија Размоска. На средбата македонските писатели се претставија со дел од своето творештво.


поетесата Роза Бојанова зборува пред публиката во Поморие

Македонските писатели го посетија и соседниот град Поморие, на покана на Општина Поморие и Народно читалиште „Светлина-1939“, кои организираа средба со помориската читателска публика. За време на посетата, гостите ги посетија Регионалната библиотека „Пејо К. Јаворов“ во Бургас, Музејот на солта во Поморие, како и спомениците на писателите во Морската градина во Бургас.

OhridNews