Охридскиот сликар Јордан Манасијески е добитник на специјалната награда на Јапонската асоцијација за современа уметност. Наградата му е доделена за неговата слика Молитва за радост, која била дел од годинешната изложба „Големите мајстори на утрешнината“, која во музејот „Лувр“ во Париз се одржа од 22 до 24 октомври. Како израз на почит кон вредноста на неговите дела, асоцијацијата го поканила да биде дел од нивната изложбена колекција.
Јордан Манасијески на големите изложби во Париз е присутен од пред две години со учеството на светски познатиот, со стогодишна традиција, изложбен „Есенски салон“ на кој изложуваат сликари од различни земји од светот. Минатата година едно негово дело влегло во тесен избор за наградата Гран-при.
Делото „Молитва за радост“, според познатиот охридски уметник, претставува порака и молитва за иднината.
OhridNews
