Охридските матуранти ќе танцуваат истовремено со врсниците од Европа

Со звуците на Штраусовиот валцер “ Летот на лилјакот” , денес, охридските матуранти по четврти пат, ќе ја прослават својата зрелост на охридскиот плоштад. Тие ќе бидат дел од Матурската Парада- манифестација која се одржува ширум Европа, во преку 70-тина градови.

Парадата ќе започне во 12 часот, истовремено, во сите градови кои ќе бидат вклучени во сателитската програма на Радио „Вал 202“ од Љубљана. На десеттина минути пред фанфарите кои ќе го означат почетокот на Парадата, градоначалниците во сите градови ќе имаат свои обраќања до матурантите. Три минути пред звуците на фанфарите, од студиото на „Вал 202“ ќе одекнат звуците на студентската Химна „Гаудеамус Игитур” која, ја симболизира зрелоста на генерацијата.

Инаку, учениците од завршните класови на ОСУ „Свети Климент Охридски“ со денови интензивно се подготвуваа за парадата и ги вежбаа тактовите на Штраусовиот валцер , водени под будното око на професорката Соња Думбалоска – Делова.