Оваа година, училиштата во охридско, не треба да стравуваат од недостиг на нафта. Меѓу 71-та општина ширум земјава, на кои им се доделени вкупно 1 455 000 литри екстра лесно масло за горење, се најде и општината Охрид. Образовните институции во охридската околина, ќе бидат снабдени со 60 000 литри од нафтените деривати, кои ги обезбеди Владата на РМ за претстојната грејна сезона.
Мерката, која е преземена од страна на Владата, доаѓа по апелот на градоначалниците. Со неа, треба да се решат проблемите, со кои се соочуваа образовните институции во изминативе години. Меѓу нив, беа долговите на општините поврзани со образованието, поради кои, дел од училиштата во земјава, што не беше случај и во Охрид, остануваа незатоплени во екот на зимскиот период.
Според службениот весник на РМ, оваа мерка ќе го олесни државниот буџет за околу 1,5 милиони евра. Трошоците за пренос на нафтените деривати ќе падне на товар на општините во земјава.
