Новинарка Сузана Вренцовска, која долги години работеше како дописник за дневниот весник ,,Вечер” и во охридското ,,Супер Радио” деновиве беше назначена за официјален потпарол на фестивалот Охридско лето. Во краткиот разговор за OhridNews, Вренцовска истакна дека новинарите повеќе нема да го губат своето драгоцено време барајќи информации за фестивалот и дека истите ќе им бидат навремено сервирани и обезбедени преку прес центарот кој ќе биде во функција 24 часа.
OhridNews: Охридско лето конечно доби портпарол новинар. Со какви амбиции седнувате во портпаролското столче?
Вренцовска: Искуството како новинар кое што го имам зад себе изминативе 10 години во голема мера ќе ми помогне успешно да ја извршувам функцијата портпарол. Одговорност има и во двете професии но сега сум од другата страна на приказната. Познато ми е, колку на новинарите им е битно да стигнат во право време до права информација и затоа седнувам во портпаролското столче најпрвин со обврска да ги исполнам нивните очекувања. Целта е новинарите повеќе да не го губат своето драгоцено време во обид да стигнат до потребната информација. Од друга страна голема е одговорноста но и честта да се гради и чува реномето на врвна установа која повеќе од 50 години го носи епитетот, најголема музичко сценска манифестација.
OhridNews: Охридско лето изминатите години функционираше без портпарол што реално претставува хендикеп за врвна институција. Што е она што ќе се промени?
Вренцовска: Токму така, од една страна тоа е недостиг во работата но и проблем во односот кон медиумите. Затоа Установата сега назначи лице кое што во секое време ќе биде достапно за седмата сила. Информациите ќе се пласираат навремено како би се остварила коректна комуникација помеѓу установата и медиумите. Во дирекцијата на Фестивалот веќе во функција е ставен прес центарот кој ќе биде во функција 24 часа, достапен за новинарите во секое време. Тие секогаш ќе имаат навремена целосна и објективна информација.
Од друга страна пак ваквата новина во функционирањето ќе придонесе за што поуспешно реализирање на планираните програми за годинешново издание на фестивалот Охридско лето.
OhridNews: Свежина има и во самата директорска фотелја, неодамна „Охридско лето“ доби и нов директор. Што може да очекуваме?
Вренцовска: Според оценките на јавноста, но и од нашата соработка на самиот почеток, впечаток е дека директорката Елизабета Јанкулоска е голем професионалец, каков што установата немала до сега. Културната политика која е приоритетна за годинешниве 40 фестивалски денови е успешното реализирање на богатата уметничка програма со настани од областа на музичката и театарската уметност. Презентирање на најквалитетни уметнички остварувања, презентирање на високо ниво на програмски содржини и ексклузивни уметници од светот, со кои најдостоинствено ќе се одбележи 52-то издание на фестивалот Охридско Лето кое ќе биде посветено на уметниците и уметничките вредности. Но покрај програмскиот дел раководството сега за прв пат воведува и обуки за вработените со цел тие поуспешно да ги извршуваат своите работни задачи. Со тоа Фестивалот ќе добие кадар со врвни вештини за тимска работа, но и ќе го подигне нивото на професионалност.
