Актерите на Охридскиот театар беа наградени со долготраен аплауз по завршувањето на претставата „Кабаре Мистериозо“, која синоќа премиерно беше изведена во рамки на фестивалот Охридско лето пред преполно гледалиште во предворјето на Св. Софија.
Тие на високо ниво го одиграа делото на италијанскиот сатиричар, драматург, актер и режисер, Дарио Фо, што го постави младиот македонски режисер Дамјан Дамјановски.
Во претставата која која е збир на сцени и теми од религијата и Евангелието настапи комплетната охридска актерска екипа: Горан Стојаноски, Јасмина Билаловиќ, Стрезо Стаматовски, Билјана Билаловиќ, Никола Тодоровски, Адријана Билаловиќ, потпомогната од исто така одличните гости Ивица Чонев и Златко Митрески.
Претставата која изобилуваше со хумор и сатира ја одбележа и добрата костимографија, како и исклучително квалитетно подготвени музички сцени. Актерите импонираа со уиграноста и енергијата која ја прикажаа на сцената, а ако може нешто да се забележи тоа е сигурно должината на претставата, која траеше 2 часа.
Синоќешниот е прв настап на неодамна формираниот Народен театар од Охрид на фестивалот „Охридско лето“.
OhridNews
