Неговата реакција следи по информациите дека од албанска страна е побарано да се намали испуштањето на водата поради неодамнешните поплави со кои се соочи нашиот сосед.
Хуманиот гест на добра волја не смее да предизвика загрозување на опстанокот на одреден еко систем со неговата флора и фауна и сите јавни објекти кои се од локален или државен интерес. При секоја осцилација на вкупната водена маса од езерото во нагорна линија постои опасност да се предизвикаат помали или поголеми еколошки последици, вели Наумоски.
– Доколку се оди на намалување на испустот од реката Црни Дрим, нивото на Охридското Езеро ќе мора да се покачи од критичната точка 693,80. Нивото на подпочвените води ќе се покачи на повисоко ниво, сите реки од сливното подрачје ќе бидат оптоварени со голема количина на водена маса. При тоа, движењето на водената маса од реките ќе биде многу успорена и истите ќе можат да се излеат и предизвикаат поголеми или помали поплави. Земјоделските поседи ќе бидат потопени од преголемата површинска вода, при поголемо брановидно струење на водата од Охридското Езеро објектите кои се во непосредна близина на обалата можат да претрпат помало или поголемо оштетување, смета Наумоски.
Охридскиот екологист стравува дека како резултат на тоа што југозападниот дел од езерото тектонски е нестабилен, со покачувањето на нивото на водата и големите брановидни струења на огромната езерска водена маса може да дојде до негово тектонско спуштање, а со тоа и можност за подземно истекување на водата од Охридското Езеро во правец на Албанскиот дел. Наумоски укажува дека во тој случај Охридското Езеро би ја доживеало судбината на Преспанското и Дојранското Езеро.
