Охриѓани бараат катни гаражи

Градот Охрид долги години најавува изградба на катни гаражи. Беа спомнувани локации во централното градско подрачје кај некогашната автобуска станица, потоа пазарот и уште неколку други места. Но таму наместо најавуваните катни гаражи никнаа станбено деловни комплекси. Од општината велат дека стојат на идејата за изградба на катни гаражи со што во голема мера ќе се ублажи проблемот со паркинг простор, но проблем е што градот не стопанисува со градежното земјиште. Најавите се дека општината од 1 јануари ќе влезе во втора фаза од процесот на децентрализација, а наскоро во владение ќе и биде отстапено и државното неизградено земјиште. Веројатно тогаш ќе нема простор веќе за никакви изговори. А доколку надлежните имаат некаква дилема околу тоа дали на Охрид му се потребни катни гаражи, можеби може да помогне анкетата што за сопствени потреби ја спроведе OhridNews деновиве, во која граѓаните недвосмислено го изнесуваат својот став по ова прашање.