Уште од синоќа река народ се слеваше кон малата пештерска црквичка во близина на Охрид посветена на Св. Еразмо.
Илјадници верници и денеска дојдоа да се поклонат во храмот на големиот светец. Од двете страни на магистралниот пат Охрид – Скопје, беа паркирани колони возила, а верниците стрпливо чекаа во ред да запалат свеќа. Дел од нив оставаа и дарови за здравје.
Култот кон Св. Еразмо е посебно изразен во Охрид, каде светецот поминал дел од животот во пештерската црква сместена над сегашниот храм во близина на Охрид, која постои и денеска. За време на својот живот се смета дека Св. Еразмо во овој крај покрстил околу 20.000 луѓе.
Св Еразмо Охридски
Овој светец од Бога даруван со чудотворна моќ е роден во Антиохија и живеел за време на царевите Диоклецијан и Максимилијан. Како архиереј патувал и го проповедал Евангелието па така стигнал и во Охрид. Откако го воскреснал синот на некој човек по име Атанас крстил многу луѓе, а идолските жртвеници ги разурнал. Поради тоа бил обвинет кај царот Максимилијан кој му наредил на бакарниот кип на Зевс да му се поклони и да му принесе жртва. Но Еразмо направил од статуата да излезе ламја и да го исплаши народот. По овој настан Св. Еразмо крстил 20000 луѓе но по наредба на царот сите биле исечени, а Еразмо бил затворен. Но тогаш се јавил ангелот и го ослободил од затворот како што многу порано го ослободил и Св. Петар. Пред смртта се повлекол во една пештера и во молитви го минал животот.
фото: Мирко Постоловски
