Охриѓани уште еднаш покажаа дека имаат хумано срце, чувство за солидарност и општествена одговорност. Љубители на класичната музика и добротвори, синоќа ја исполнија големата сала на општина Охрид на хуманитарниот концерт што го организираше Лајанс клубот „Лихнидос“ за помош на лица со посебни потреби.
Публиката уживаше во едночасовниот настап на учениците и професорите од ОМУ „Методи Патче“, кои несебично ја поддржаа хуманата акција на „Лихнидос“. Симпатиите на публиката ги освоија младите Анастасија и Марија Филоски, Мила Коруновска, Огнен Секулоски, Искра Атанасова – Митуш, Еда Шазиман, Даниел Мојсоски и Ивона Базгалоска, а силен аплауз добија и нивните професори Даниел Чуркоски и Емилија Маринова.
Организаторот им се заблагодари на сите помагатели и поддржувачи, најавувајќи дека ЛК „Лихнидос“ и натаму ќе продолжи да ја негува уметноста и да им помага на ранливите категории граѓани.
OhridNews
