Охриѓани кои што сакаат да изучуваат странски јазик или да посетат обуки за доквалификација, а немаат доволно време и можности да одат на курсеви, можат да се приклучат на електронското учење, кое веќе една година го спроведува охридскиот Работнички универзитет “Кузман Шапкарев”.
Од управата на оваа установа велат дека E-learning или учењето на далечина е најсовремен метод за стекнување знаења во светот.
-Електронското учење го воведовме минатата година и e прво од ваков вид во Охридскиот регион. Со него може да се посетуваат часови за Англиски и Германски јазик, за Сметководство и за Информатика. За таа намена изготвени се посебни програми за следење на курсевите, а слушателите единствено треба во својот дом да имаат компјутер и интернет за да можат да се вклучат во ваквиот вид на настава. Значи наставата се следи од дома, а секој слушател си има своја лозинка. Со професорот кој го води курсот и со останатите членови на групата комуницираат и се договараат преку интернет, вели Славица Ристеска, директор на охридскиот Работнички универзитет “Кузман Шапкарев”.
Таа појаснува дека за овие курсеви можат да се пријават лица на различна возраст, а во интерес на ефикасноста на предавањата, една група на слушатели може да брои најмногу 8 лица.
Курсевите сеуште се со промотивна цена од 5.000 денари па нагоре и истата зависи од фондот на часови.
