По повод прославата од првиот роденден на клубот ЕкоДром и 10 годишнината од одбележувањето на денот на Охридското Езеро, охриѓани ќе организираат велосипедска тура околу Охридското Езеро. За ден на Езерото е прогласен 21-06 и од 2000 година секоја година се организира пригодна манифестација за прослаАва на денот и тоа секоја година како домаќин, редоследно е еден од трите градови, во тековнава 2010 домаќин е Охрид.
На истиот датум минатата година групата на ентузијасти, велосипедисти, заљубеници во природата ја потпишаа првата одлука за регистрирање на велосипедски клуб, истовремено едногласно беше прифатено за роденденот на Клубот и денот на Езерото да се започне со органзирање на една велосипедска тура околу Охридското Езеро.
– Оваа наша идеја е поддржана и од страна на Велосипедскиот Клуб – Поградец од Поградец, со што на овој маратон со заеднички сили посакуваме да му дадеме несекојдневно значење како на регионално така и на национално ниво и од страна на Р.Македонија и од страна на Р.Албанија, со заедника цел да се дружиме, да спортуваме, да уживаме во убавините што ни ги подарила природата и истовремено да се потрудиме да ги зачуваме – истакна еден од основачите на клубот Екодром , Александар Јованоски.
Вкупна должина на турата изнесува 97 км при што ѓи опфаќа сите населени места долж крајбрежјето на езерото, прекрасните планини Галичица и Јабланица, со неповторливи панорами од сите страни. Времетраење на турата се очекува да биде 6-7 часа, што за средно подготвени рекреативни велосипедисти не би требало да претставува проблем. Како и во други подолготрајни маратони потребен е подготвен велосипед без разлика дали се работи за планински или друмски, резервна гума и основен алат, заштитна кацига, и се разбира лесна но енергетски силна закуска.
– Единствено несекојдневно е потребата да ја понесете вашата патна исправа – пасош за патување надвор од границите на Македонија. Виза за влез во Албанија не е потребна и покрај преговарањата, Министерствата за надворешни работи да дозволат отворени граници за велосипедистите за денот на езерото, тоа не е дозволено. Сепак се надеваме дека од страна на полицијата нема да имаме голем застој на граничните премини.– велат од “Екодром“
Пријавувањето на заинтересираните е во тек, потребна е предвремено пријавување заради претходна подготовка на листа на велосипедисти учесници.
М.П.
