Охриѓанката Славица Танеска- повторно најдобра меѓу младите сликари

Талентираната охриѓанка, Славица Танеска, ученичка во ОУ „Григор Прличев“ го освои првото место во дисциплината сликарство на неодамна оддржаните 45- те по ред „ Детски Рацинови Средби“ во Велес. Танеска беше избрана како најдобра помеѓу педесетте натпреварувачи од целата држава кои се натпреваруваа во дисциплината сликарство.

Оваа награда Славица Танеска ја освојува по трет пат. Таа е најмладиот освојувач на првата награда во 2009 година, а исто така и со најмногу освоени први награди досега на оваа престижна манефестациа во сите дисциплини во кои се доделуваат награди. Нашата сограѓанка Славица Танеска досега има учествувано на неколку ликовни колонии за возрасни, а меѓу првонаградените беше и на годинешниот ликовен конкурс распишан од страна на Здружението на граѓани Богојавление.

Славица на 12 години ја направи првата самостојна изложба во Центарот за култура ” Григор Прличев” Охрид за која OhridNews информираше. Учесник е и на повеќе групни изложби за возрасни.

Наредната година предвидено е да се организира и  нејзината втора самостојна изложба која многумината обожаватели и љубители на сликарската уметност нестрпливо ја очекуваат.