Најголемиот дел од балконите и дворовите низ Охрид и оваа пролет ќе останат празни, затоа што охридските домаќинки се помалку имаат време за одгледување на сезонски цвеќиња. Тие велат дека покрај брзиот ритам на живот, големо влијание врз интересот за ова хоби има нискиот стандард и сиромаштијата, кои цвеќарството го претвориле во вистински луксуз.
Сопствениците и вработените во земјоделските аптеки, велат дека иако сезоната за садење на сезонско цвеќе е започната, интересот за семе и садници е многу мал.
– Последниве неколку години, значително е опаднат интересот за садење на цвеќиња, па и оваа пролет не очекуваме нешто да се промени. Семе и садници за цвеќе купуваат само оние жени кои што имаат имаат повеќе време и место за одгледување. Најчето работиме со жените од постарата генерација и пензионерките, а додека пак вработените и младите домаќинки ретко доаѓаат кај нас, велат тие.
Цените на семенскиот материјал за цвеќиња низ охридските земјоделски аптеки и оваа година се движи од 25 до 60 денари за кесичка. Садниците може да се купат по најразлични цени, кои најчесто се формираат во зависност од видот на цвеќето, а може да се набават и во некоја од поснабдените цвеќарници.
Најпродавани сезонски цвеќиња се ниските цвеќиња кои растат од 10 до 20 санитиметри, како што се љубичиците, петуниите, џунџулињата, и други.
