Онлајн настава по македонски јазик за Македонците во Грција

„Учи македонски онјалн“,  специјализирано онлајн училиште за дополнителна настава за учениците од дијаспората, ќе организира  настава по македонски јазик за Македонците на училишна возраст кои живеат во Грција. Пријавувањето е од утре, а часовите е планирано да почнат на 17 октомври.

Учењето на македонскиот јазик е бесплатно. Потребно е само да се пополни формулар за упис со личните податоци на веб-страницата на ова специјализирано онлајн училиште.Секој ученик ќе добие распоред со часови, професор, паралелка и термин за следење на наставата.

– Неа ќе ја изведуваат професори од Македонија во мултимедијална училница во која со учениците ќе имаат аудио и видеоконтакт, според најсовремените информатички технологии за онлајн настава во светот, информира Митко Јованов, основач и раководител на „Учи македонски -онлајн”.

Наставата ќе се изведува еднаш неделно во текот на учебната година во термини погодни за учениците и според официјалните наставни програми на Република Македонија. Секоја паралелка ќе има најмногу до 10 ученици. Учењето на македонскиот јазик е поделено во три степени – почетен, среден и напреден, а секој степен содржи 35 часа.

За учениците кои сакаат да имаат диплома за познавање на македонскиот јазик, „Учи македонски-онлајн“ ќе  им организира полагање испит пред комисија со претставници од надлежните научнообразовни институции во Македонија.