Перманентна работа за промовирање и унапредување на крводарителството на територијата на општините Охрид и Дебрца е заложбата која Црвен крст Охрид ја спроведува континуирано, посветено и совесно, вели претседателот на Црвен крст Охрид Сашо Точко по повод 17 март, Денот на крводарителството во РС Македонија, воедно честитајќи им го овој ден на крводарителите изразувајќи и благодарност и почит кон сите крводарители, поединци, фирми, институции кои го помогнале развојот, унапредувањето и омасовувањето на крводарителството во Охрид и Дебрца.
Како резултат на постојаната ангажираност на активистите на Црвен крст и службите за трансфузиологија во текот на цела година, се задоволуваат потребите од крв и крвни продукти за пациентите во здравствените установи во нашиот град. Хуманоста што ја покажаа нашите крводарители преку доброволно дарување крв придонесе да бидат спасени многу човечки животи, вели Точко.
Со оглед на ситуацијата со Ковид пандемијата, додава Точко, крводарителите кои во текот на 2021 година ги достигнале своите 5, 10, 15, 25, 75 или 100 крводарувања ќе бидат поединечно повикани во Црвен крст Охрид за да ги подигнат своите признанија.
OhridNews
